IMUHAL D WAWAL N UFELLAḤ DI TUDRIN
Yella yiwen n ufellaḥ zik di taddart-nneɣ, cfiɣ-as-id, yal taṣebḥit, ad twaliḍ: taqabact ad tt-yerr ger tuyat, amger deg ufus, lemqes, ad inddeh ar wayla-s. Ass kammel, fres, nqec, leqqem, zzdem-d, qeddeṛ. Aya deg-s d abaɣur, deg-s d addal, yufa iman-is d ayen kan. Ittwassen di taddart d amdan ixeddmen cɣel-is, inǧa i unebbec d usmenteg, d txeftin, d tqilεin. Ihi ula d nekni akken, d ifellaḥen deg unnar n tmaziɣt.
AFELLAḤ ISERFA WAYLA-S
Yiwen n ufellaḥ yesεa yiwen wayla n tyerza. Ihi niqal yelha, ikerrez-it, izerreε-it, ittak-d ṣaba. Tikal d irden, tikal d ilni, llbecna, lleft, llbaṭaṭa, irna-as s llḥemmeẓ. Netta ur iwata ara akken-nni. Seg imi yezreε deg-s llḥemmeẓ, yuɣal yefcel wakal-nni. Ihi yuɣal ur d-ittak ara, ittenɣas di llɣala, iwata-as ad ustaεfu, azal n 5 n iseggasen. Ibedd sdat wakal-nni iga-as azul(ibqa-as sslam), yenna-as :
— Ǧǧiɣ-k di talwit ay aḥṛiq-iw, ar εamayen akka ma irad uxellaq.
Seg wassen mi ara d-iεeddi syen ikṛeh ad issiked ɣer uḥṛiq-is, izelleg udem-is ɣer zelmeḍ wala ad issiked ɣur-s.
AFELLAḤ DI TMAZIRT-IS
Inna-ak yiwen n ufellaḥ ufiɣ-t ineqqec deg tmazirt-is : "amcic s immal ad as-teslufuḍ ad ireffed tajeḥniṭ-is". Nek nniɣ-as : "Akken i d amdan ur nessin azal n wazal, yaεni lleqdeṛ".
Ufiɣ-t ufellaḥ-agi d amdan issnen taqbaylit, d amdan diɣen yessεan tarmit. Acimi i d-yenna akka? Acku nger-d awal ɣef "wazul", gar wagad yemyusanen, ɣef wemdan iṭṭamaεen tirririt n wazal netta ur yesεi ara udem yelhan, yezga yesxenfeṛ, ma ur t-tluεaḍ ur ak-id-ittlaεi, amzun akken tennuɣem d icenga, maca gar-awen kra ur yelli.
AMAR TAFAT
