Win iteddun s tezdeg ɣef tidet, ernu infeε medden s tiktiwin-is, yebna ur isedrem, tajmilt fell-as am yiṭij mi d-icreq ɣef tmurt.
Yiwen zaεma d amussnaw ziɣen ur iḥsi amek ara d-yenṭeq. Ihi yenna-k : « nek ad d-iniɣ akken iyi-yehwa yerna ad yezri wawal-iw!»
Nniɣ-as : «acku yeḥma ǧib-ik.»
Yenna-k « cfu ɣef wayen i dak-nniɣ.»
Nniɣ-as : « amussnaw mačči d azger.»
Yenna-k : «sefhem-d iman-ik.»
Nniɣ-as : «amussnaw ur yeqqar ara "Muhh" am uzger!»
Yenna-k : «ma yella kra i d-nniɣ yeffeɣ i wennar?»
Nniɣ-as : «ḍefṛeɣ-d awal i d-tenniḍ zgelli, mi nebda nettmeslay.»
Yenna-k : «teččiḍ taxsayt!»
Nniɣ-as : «ini-d : "nek d ameddaḥ". Sliɣ-ak-in.»
Ttaruɣ s tmaziɣt, ttutlayeɣ tamaziɣt, tedduɣ s tmaziɣt, ur sarmeɣ ad uɣaleɣ d ṣifa-nniḍen.
Amar Tafat
