Yeqqar yinzi ama s teqbaylit «ulac, ulac s wulac». Ma s tṛumit yeqqar « il y'a rien pour rien ». D win i d anamek n wawal, yiɣil ad d-iɣez umdan ayen yebɣa deg wakal, war ma ixelleṣ, netta iwata-as ad yeεteb umdan, i wakken ad iɣellet, war llaεtab ur d-ittas wayen yellan ifazz. Amedya, deg uzenzu, ma ur d-teqḍiḍ ara tiɣasiwin igerzen ara tesenzeḍ, ur tezmireḍ ad trebḥeḍ. Ihi win yebɣan ad irbeḥ iwat-as ad iεteb, ad iseqdec amaynut, ad ittṣeggim tiɣawsiwin-ines iseqdac alama iwala jebdent-d medden, imir ad yeḍfeṛ abrid-nni am wakken d aṣaduf(lqanun) ur t-ittxallaf ara.
Akken ula deg taɣult n tsekla d yidles, iwakken amdan ad yuɣal d amussnaw iwata-as ad iṭafaṛ abrid s wannuz ur yelli s ugabeṛ, neɣ s tḥila d takeṛḍa. Iwata ad d-yaɣ umdan idlisen, ad d-yaɣ tisɣunin, ad t-wennteḍ win ik-iqenεen s tmussni-s, ad as-tiniḍ ɣas tanemmirt. Ma yella xedmen medden akk akka ad ṣegmen llecɣal s umata, yal tikelt ad d-nettmagar amaynut yessεan anamek, maca ma ukellex, inna-yas yinzi "a win izerεen aḍu, ara d-imger ala ulac».
Amar Tafat
