Mi ara k-d-yefk Ṛebbi ddu s llḥeq d tezdeg. Yella wass-a, yella uzekka, yella uẓekka.
Imura imeqqranen n umaḍal ittwasnen deg umaḍal, amek armi ur ten-kṛihen medden? Acku teddun akk d yiman-nsen, akked d yidlisen-nsen ucbiḥen umεinen. Syen d tasawent, ttbanen-d ur sεin ara tazmert n tmuḥqranit s wacu ara ḥeqren imdanen yellan deg ubrid-nsen. Win iteddun weḥed-s ur izmir ara ad iḥqeṛ. D tagi i d tillawt. Tazmert-nsen d tira, d idlisen, ttɣiman-d ur fennun, s ufella isem-nsen yura s wureɣ. Iteddu yisem-nsen seg tmurt ɣer tayeḍ, mačči deg uqwiṛ kan i yettezzi. Win i ten-iɣɣaren ur asen-iberru, udfen deg wallaɣen n yimdanen, ṛeṣṣan akken iwata. Ula d Dda Lmulud n At Mεemmeṛ iteddu s tarrayt-agi.
Imassanen d imussnawen n tidet
Imassanen d imussnawen n tidet, ttmeslayen s uskasi anwa ara d-yafen tifrat i yal ugur iwaεṣen imdanen yellan ɣef takurt-a seg A alama d B, i wakken ad magren iseɣ d userhu. Nekni mazal-aɣ deg uweεεeṣ — d win-a umi nrennu isɣaren d usbuḥru. Win iweεεan i wayeḍ ad t-iweεεeṣ. Ala win ara k-isalin aman d asawen. Acu ara d-yeqqimen deg uweεεeṣ?! Acu ara d-iqqimen di tekṛiṭ? Ur illi userhu deg ineggura-agi. Ma cḍeɣ surfet-iyi, ma sweqmeɣ nemmret-iyi.
Lemɛun di tsekla
Inna-ak yiwen : kunwi s imaruten-agi tesexlaḍem-d llemεun deg iḍṛisen-nwen.
Nniɣ-as : ahat!
Yenna-ak : s tidet mačči d tikerkas, acku nekki-nni ɣɣareɣ ayen akk i d-yettarum.
Nniɣ-as : iwara-ak kan Ṛebbi. D tasekla kan d aya. Di tsekla yal tamsalt tettili, d inzi, d tanfalit, d asefru, llan wid i d-isnulfuyen. Ma tḥeṛceḍ ad d-tlemdeḍ nezzeh nezzeh. Ad takiḍ ma teṭṣeḍ hhhhh. Ma d llemεun-agi, kkaten akk s llemεun medden. Ula d kečč ɣas ewwet ma tḥusseḍ i kra. Ulac win i ak-ittalasen. Akken i ak-qqaren ɣef tmuɣli : «allen ur sεint ara ẓẓeṛb.»
Amezruy s yegziren
Win ara yarun, neɣ ad imeslay s umezruy yeǧǧa igziren, atan yettaru kan i wid d tid ur nessin. Wamma ɣer wid yessnen d aɣunfu. Acku, widen d tiden ara ilemden amezruy aqermaḍ, neɣ ur nessεi ixef, ma d imdanen ur nessin ad ddun di fulkluṛ. Inni-d tamsalt tekmel, s wayen akk tesεa, neɣ awi-d awata-ines s wacu ur tettṣeḍḥiḍ sdat n yimussnawen ara k-iɣɣren neɣ ara k-yeslen, ma yella ur tessineḍ yif-it ma ibeddel asentel umdan, yif-it ma ixdem taɣawsa isehlen fell-as, ad tt-isuffeɣ telha tekmel.
Tajmilt i imura imezwura n tmaziɣt
Mi ara d-yaweḍ akka ineḍṛi n tmaziɣt, am Yennayer, ulamek ur d-ttmektayeḍ ara wid d tid i as-igan tazwert s wayen yesεan azal ur nettfaka, i tsekla n tmaziɣt. Cfiɣ deg iseggasen n 90, nettafef-d kra n yidlisen neqqar s tutlayt n tmaziɣt talatinit, nettaf-iten d ddwa i wallaɣ, d usfukti-ines, armi yeḍḥa-d nuɣal nessen ad naru s tutlayt am nutni : Adlis Inna-as Ccix Muḥend U Lḥusin yura Lmulud n At Mεemmeṛ, Askuti n Saεid Saεdi, Asfel n Ṛacid Ɛellic, Iḍ d wass n Ɛmeṛ Mezdad. Ulamek ara nezger ɣef idurar yecban wigi. Nufa anda nelmed armi nuɣal am nutn, neɣi ass-a neɣ azekka ad nuɣal am nutni. Fell-asen tajmilt ur tettfaka.
«Amussnaw ilemed alama yemmut», akka i d-yenna yinzi. Kra n imutnawen nnan-ak : «nḥudd-itt-id!»
Amar Tafat
