Isefra akked tudert n umedyaz aqbuṛ Beɣdad n tama n Izarazen. Illul di taddart Tazelmaṭ n Izarazen deg useggas n 45. Isem-is yegra-d deg umezruy, acku llan imɣaren i as-d-icfan, yessnen isefra-s, gran-d ar ass-a sawalen-ten medden. Imi timawit d tin ur nettdumu s waṭas, tatut tettawi idelsan d yilsan, ad t-id-nerr ɣer tira ula d netta am imedyazen iqbuṛen.
Yeffeɣ Beɣdad yetekka
Yeddur' agafa
Lukan d tafellaḥt i yeɛna
Ad ixdem naɛma
Ad isider deg watmaten-is
Imi d llɣerba i yeɛna
tewwet-it lmeḥna
Tusa-as-id ɣef yiẓṛi-s.
Ddaɛwessu n llwadin tewɛeṛ
Am uɣebbaṛ deg waluḍ
Am tmes m'ara tecɛel
Di teẓgi teṭṭef amkan-is
Beɣdad amcum bu tlufa
Teǧǧa-d deg-s ccama
Tusa-as-id ɣef yiẓṛi-s
Ad naf Beɣdad d yiwen n wergaz am wiyaḍ, yezweǧ yeǧǧa-d tadfert. Ɣer taggara yemmut babas, teqqim-d yemmas aṭas i terna tedder ɣur-s.
Yiwwas aɛni, wiss-n d acu yeḍṛan, yewwi-d asefru ɣef tmeṭṭut-is, Feṭṭa Uḥemduc
Tenna-i Feṭṭ'Uḥemduc
A Beɣdad qcaɛ yemmak
Ṭṣeɣ armi yedda yiḍ
Ṭfeɣ i wul ameḥbak
Ddiɣ d arbib s claɣem-iw
Ṛxiɣ-ak-d a gma i leḥnak
Ad naf diɣen ɣer taggara, Beɣdad teddez-it lmeḥna, d amɣar d aderɣal, ɣur-s igerdan, gran-as-d wussan isutur tin ṛebbi. Ittawi llaɛcuṛ ɣer At n udewwaṛ-ines. Ittawi llaɛcuṛ ɣer at n udewwaṛ-ines, ikkat amenddayer isefruy, iddukkul netta d yiwen n umṛabeḍ, izuɣur-it. Di tallit n userwet ad ffɣen ɣef inurar,
di tallit n uzemmur ad ffɣen deg Izarazen.ittawi llaɛcuṛ sɣur at Izarazen, netta d wemṛabeḍ-agi.
Inna-as yiwwas i mmis i wumi sawalen Muḥ Beɣdad :
Nniɣ-ak a Muḥ Beɣdad
Ayen iyi terziḍ tufiḍt
Babak d aderɣal
Yemmak d mm yiwet n tiṭ
Ad ḥewseɣ ar tameddit.
Ak-d-ččaṛeɣ taculliḍt.
Dagi tella tamawt : Muḥ Beɣdad-agi, ɣer taggara-s yuɣal d yiwen n umjhed ameqqran di tegrawla n 54, iǧuhed di temdint n Lezzayer s yisem n Muḥ Cinwa. Aɣerbaz(llakul) n taddart n Bushel ɣef i t-sersen. Ittekka deg ugraw n Aɛli la point, ilaq akkagi. Akka i yedder Beɣdad armi d asmi yemmut deg
useggas 1945. Yella d yiwen n umdan ttɛuzzun medden, ttran-t ttkabaren-t. Lɣaci meṛṛa n taddart-is, yellan di tallit-is, lemden isefra-as, ama d argaz, ama d tameṭṭut. Isefra-s ur rzan ara tayri, ur llin d wid ixeṣṛen. Ɣur-s isefra n lemdeḥ, ittdekkiṛ Nnbi. Eeeeh ɣur-s isefra ɣef tudert-is, ɣef teṣṛeḍṭ(ɣef ddin), yaɛni ittdekkiṛ ɣef Nnbi netta d terbaɛt n llɣaci, mi ara d uɣalen di tẓallit n llɛica, di ǧamaɛ n Sidi Lḥaǧ U Si Sɛid. Neɣ di ṛemḍan. Abaɛda di ṛemḍan, tettimɣur taggayt. Qqaren : "ikkat amenddayer ittdekkiṛ, llɣaci ttdekkiṛen yid-s. Ad yili Beɣdad, d yiwen n umedyaz isefran imeḍṛa yellan deg tallit-is, d wayen i s-d izzin.
Inna-as Ccix Muḥend, refdent tura d tizlit
:
"llawleyya anida ttilin
haten deg udrar ɛussen
s wallen i nudan tamurt
s uḍaṛ ur tt-id-ɛfisen
ssiferret tagut ɣef ul
a kra i tt-id-isḍaṛen".
Yura-t-id Amar Tafat
