Sin ttemǧadalen, yiwen d amussnaw n tmaziɣt, d argaz ameqqran, wayeḍ d ilemẓi n wakud-a n tsuta-agi tamaynut
Ibedd ilemẓi ɣur-s, inna-yas i umussnaw:
Nniɣ-as, ad neg ardag, ur ittban d ayzag, bu tmussni yawi-tt-id. Ur ttili d amenṭag, wala d amenṭag, neɣ ax-ttin err-itt-id. Tusiḍ-iyi-d d amaccag, tefɣeḍ ameggay yerna taḍṣa tusa-k-id!
Irra-yas Umussnaw, yenna-yas :
Tusiḍ-i-id s wurfan, qubleɣ-k-in d aman, deg illel ar tettεummuḍ. Ayen i-id-tettreḍ iban, erriɣ-ak-in s ccan, wiss-n ahat ma tt-cfuḍ. Aɣrum nettekkes-as iran, ittwačč d aẓidan, sebleε kan ma tt-ṛwuḍ
Inna-yas Uqcic:
Lemdeɣ taεṛabt taṛumit, rniɣ tagnizit, ur ttuɣaleɣ ɣer deffir. Tagi-inek n msakit, ur telli di ddunnit, ayaziḍ ur ittferfir,. Walaɣ-kin tecbiḍ tissirt, neɣ tala n tiqit, d amaεduṛ mi yettkerkir.
Irra-as Umussnaw
Tutlayt-iw tewweḍ amaḍal, ssnen-tt at yimmal, d wagad iran ad ẓṛen. I tgerzeḍ ay axelxal, ddu kan ɣef wakal, ur d-ṛeṭṭel afriwen. Γas tkeṛheḍ amellal, ur d-qqaṛ d adal, ak-ḥesbeɣ seg uḥdiqen.
Yuɣal inna-as Uqcic :
Asmi d-kkreɣ meẓẓiyeɣ, am ayetma qqareɣ, yiwen webrid i newwi. Akken xedmen, nek xeddmeɣ, ur ttawḍeɣ s igenni. Ḥemdeɣ Ṛebbi mi gerzeɣ, akka ara kemmleɣ, fkiɣ-ak tafat gefri.
Irra-yas Umussnaw
Anwa i gnekkṛen llaṣel-is, yeǧǧa di nnif-is, armi s-rnan tabarda? Wi tebεen aεebbuḍ-is, ad izenz ixef-is, mačč' a d-yaki di tnafa, d tikerkas i d aεwin-is, aḍu ay isem-is, ur iban anida yella!
Yuɣal-as weqcic s awal yenna-as
Tenniḍ ur sεiɣ tawwurt, tuqmeḍ-i taεrurt, i wakken ad bedleɣ tikli, tifirest akked tzemmurt, tayaziṭ tsekkurt, akka i tt-yebna Ṛebbi. Lemmer i tettraḍ tamurt, ad tesεuḍ tugdut, teẓṛiḍ amdan d ilelli.
Yerra-yas Umussnaw
Lemmer d tikti n tegmat, ad d-dmeḍ tadwat, d agemmay ar ad taruḍ. Tamaziɣt uḥdiq yeɣra-tt, yegza d tayemmat, amek akka ad t-ttɣunfuḍ? Tutlayt ur tesεi tacemmat, am kečč ɣas yeǧǧa-tt, mazal lhiba-s ad d-suḍ.
Sɣur Amar Tafat