Taḥirfat n tmaziɣt - tigemmi n yimaziɣen - Ideqqi n At Xiṛ - Amar Tafat
Amagrad-a ɣef ideqqi(afexxaṛ) uriɣ-t-id 26 n yiseggasen-aya mi rziɣ ɣer taddart n At Xiṛ, m'akken iyi-necden ɣer tfaska Tidukla n Iselqam, yeffeɣ-d deg weɣmis Yalass, neɣ s tefṛensist le Quotidien de Kabylie(i d-yurew liqal weɣmis Le Soir d' Algérie) deg useggas n 2000, amagrad-a ḥrzeɣ-t imi id-yewwi ɣef tgemmi, yerna am netta am wid i d-uriɣ s umata deg weɣmis-a, neɣ deg wid nniḍen yezrin. Ur bɣiɣ ara ad yejlu di tatut rriɣ-t-id ɣer tirawt n wass-a, yuɣal-d yecbeḥ.
Ma nenuda ɣef yixfawen n tɣarma Tamaziɣt ad naf gten di tmurt n Leqbayal, ad ten-naf sdat-nneɣ assa nettwali-ten yal ass; ad ten-naf nernan di talɣa d tecbeḥt. Ixfawen ara nemagger, am iselsa n yimaziɣen ara d-naf yenerna wazal-nsen sɣur kra n tdukliwin d temnaḍin, am tidukla Ṛacda ara imehhlen di taɣult agi, am wakken yessefk, akked temnaḍt n at Hicem yessnernan azal n tẓeṛbay; Ad naf daɣen aẓṛef Amaziɣ s immal yettili-d wesnerni deg-s sɣur iḥeddaden mucaɛen n At Yanni, akked Ifeṛḥunen. Ideqqi daɣen (neɣ afexxaṛ) i ɣer nteddu ad d-nawwi aṭas n yisallen fell-as, d win i d asentel n wass-a, ad naf s immal yettili-d umaynut deg wexxam-is (di taddart At Xiṛ, Taɣiwant n Meqlaɛ).